Նորովի համագործակցություն դեսպանատան հետ

ՀՀ առողջապահության նախարար Հարություն Քուշկյանը հանդիպել է ԱՄՆ միջազգային զարգացման գործակալության ներկայացուցիչ Ռուբեն Ջամալյանին, ԱՄՆ դեսպանատան աշխատակիցներ Ահարոն Իսակսոնին և Անի Մելքումյանին:

Հյուրերը նախարարին են ներկայացրել մինչ այժմ իրենց կողմից իրականացված ծրագրերը, մասնավորապես` «Սուրբ Գրիգոր Լուսավորիչ» բժշական կենտրոնում, Վեդիում, Թալինում կատարած աշխատանքներում: Նրանք նախարարին առաջարկել են շարունակել համագործակցությունը դեսպանատան և առողջապահական համակարգի միջև: Ծրագրերն առավել արդյունավետ ու նպատակային դարձնելու համար հյուրերն առաջարկել են առաջիկայում իրենց ներկայացնել այն պետական բժշկական հաստատությունները, որոնք առաջնահերթ բարելավման կարիք ունեն:

Ահարոն Իսակսոնը հավելել է, որ ծրագրերն իրականացվելու են ԱՄՆ միջազգային զարգացման գործակալության հետ համագործակցությամբ, իսկ ներդրումներ կատարվելու են երկրի հարավային և սահմանամերձ տարածքներում:

Հարություն Քուշկյանը նշել է, որ ներկայացված առաջարկները համահունչ են առողջապահության նախարարության վարած քաղաքականությանը և ռազմավարությանը, այն է` մարզերի համաչափ զարգացումը: Նախարարը հավելել է, որ չնայած Համաշխարհային բանկի և այլ ծրագրերի շրջանակներում համագործակցության շնորհիվ մարզերում հիմնանորոգվել և կառուցվել են բազմաթիվ բժշկական հաստատություններ, այնուամենայնիվ այսօր համակարգում առկա են բժշկական կենտրոններ, որոնք ևս վերակառուցման կարիք ունեն: Մասնավորապես երկրի հարավային մասում` Մեղրիում արդեն ծրագրվել է կառուցել նոր բժշկական կենտրոն, որն իր մեջ կներառի Մեղրիի և Ագարակի բժշկական կենտրոնները: Այդ տարածաշրջանում արդիականացման կարիք ունեն նաև գյուղական ամբուլատորիաները:

Կողմերը քննարկել են ծրագրի շրջանակներում հետագա համագործակցության պայմանները, հեռանկարները:

Ամփոփելով հանդիպումը` նախարար Քուշկյանը նշել է, որ ամերիկյան կողմից առաջարկված ծրագիրը կլրացնի երկրում իրականացվող լայնամաշտաբ բարեփոխումները մարզերում և Երևանում:

Հարցեր, պատասխաններ, մեկնաբանություններ